《撐住吧朋友》
一月開始嘅疫情，到今日已經接近三個月，大家由開始嘅放假心態、自娛自樂，到今個月，好多讀者都有pm我同我傾訴生活上面有唔同嘅困難，有好多人話，已經唔再怕肺炎了，怕餓死怕無錢供樓比人收樓怕公司倒閉要破產等等。
坦白講，呢個環境我都唔好受，公司生意差，收入減少，當日我決定出書時，老婆曾經問我，你好唔掂咩，點解仲要出書？係，佢知我其實已經無出書嘅意慾好耐，就算寫都係放上網呃個like，搵個認同感同滿足感，但係一月收爐之後，二月整個月都無再有收入，三月先重啟工作，但市道如此，唔好話追返之前嘅數，保唔保得住當月收入都成問題。
好多個夜晚，我都好驚有日會捱唔住，情緒最差時甚至諗過輕生，如果唔係細佬係醫院，我真係可能會諗埋一邊。
到四月份，老婆亦正式停工，二三月佢幫手撐住，但無得返工亦無任何收入可言，大家只可以期望疫情完結，早日回復正常。
美國有好多人示威要求重啟工作，係香港人眼中係自尋死路，但美國人無儲蓄習慣，先洗未來錢，一係申請失業救濟金，一係就破產，然後人生就重頭來過。
香港比較好，大部份人都有儲蓄，頂一個月兩個月都無乜問題，但三個月呢？四個月？問題係大家見唔到岸，好唔實在，唔知自己仲要捱到幾時。
航空、旅遊、零售、餐飲，受影響太多太多，有朋友公司係香港某行業算行頭最大，一朝炒咗五十人即走，做咗十幾廿年嘅員工收到封信時，真係當場哭成淚人；有朋友做網店請臨時包裝工，竟然收到七百幾人求職。
好多人捱唔住了，只係無講到出口，但抒發唔到嘅話，只會愈來愈情緒失控。
如果你哋需要人去聽吓，我好樂意當一個陌生嘅聆聽者，幫到嘅盡量幫。
以前我總覺得「撐住」係一句廢話，因為完全幫唔到件事，但到依家我先發現，係你最心傷之際，一句撐住比起完全無嘅，都係一種支持同鼓勵。
人生之中總有順逆境，諗起當年會考之際撞正沙士，畢業之時遇上金融海嘯，今日又到肺炎，睇吓Espirit都要結業，曾經嘅超強嘅藍籌都落得如此下場，或者我哋都需要接受高低、迎接起落。
係呢個時間，我同pm我嘅讀者都有講，或者係一個好時機去俾我哋重新審視自己生活，思考吓自己可以做乜，有乜想做又未做。
我哋唔係面對困難等待，而係改變自己去睇吓有邊條路行到，我有諗過做外賣仔，又有諗過再係網店賣多少少野，又有諗過搵過份工，出路係有好多，係呢個時勢，撐落去先見到曙光，人生之中有好多痛苦嘅時刻，捱過之後好多年睇返，就成為一件值得講嘅故事。
朋友們，撐住，有好多人同你一齊努力，天佑香港。
－－－－－－－－－－－－－－－－－－－－－－－－－
《弊傢伙，我女朋友有咗》經已上架，有興趣的朋友歡迎點擊下列連結購買。
預購 BY Payme, FPS, Alipay連結：https://forms.gle/UEdH32PfVD2cp5nK6
預購By 掌鋪，可以使用Visa Master Card連結：
https://maydreaming.boutir.com/i/WDnmnPAAA
Search